☆北海道夏之旅 Day 1☆

香港 > 東京 (羽田機場) > 旭川 (雪之美術館) > 美馬牛 (Kan No Farm > Kumasan Log Family House)

28號晚出機場搭香港飛東京羽田機場的零晨機, 我們坐窗口位, 一上飛機便瞓覺. 清晨四點幾醒咗, 見到窗外啱啱出太陽, d雲橙紅色的, 好靚. 跟住食早餐, 味道一般. 六點幾到達羽田機場的International Terminal, 在機場梳洗一番後, 便搭shuttle bus到ANA Terminal, ANA Terminal比International Terminal大很多, 商店亦多很多, 足夠我們消磨兩三小時候機的時間. 我們除了逛商店之外, 亦走了上去展望台看飛機, 仲俾我哋見到架比加超飛機添! 大約十點半上飛北海道旭川的飛機, 一個多小時便到旭川了, 在機上看到旭川市一格格的田野已經興奮, 亦代表著我們的北海道賞花之旅要開始了~

雪之美術館

從機場搭了45分鐘的機場巴士出旭川市中心, 在旭川駅鎖好行李之後, 便去第一個景點了 - 雪之美術館. 今日好好天, 見到咁藍的天, 心情都很好. 雪之美術館內所有嘢都有雪花, 幾得意.

Kan No Farm

跟住搭火車去美馬牛駅, 美馬牛駅是一個好細的無人車站, 個站係一間屋仔咁, 都幾得意, 我們當然要拍照啦. 之後按著網友的捷徑行去我們第一個花田 - Kan No Farm. 我們諗住只係行一陣, 所以無鎖行李 (雖然美馬牛駅都無locker, 不過我諗站附近的小商店應該可以待管行李嘅), 點知那條路真的是捷徑, 大概20分鐘便可到達, 不過... 當中要行一段山路, 拉著行李確實有點麻煩, 結果我們將d行李放係草叢中 (現在想起來當時真的是有點大膽, hehe). 上到山上見到一大遍薰衣草花田, 好似紫色的地毯咁, 真的好靚. 這裡一邊是薰衣草花田, 另一邊是彩色花田, 兩邊都好靚喔~ 這個花田的主人很細心, 在花田整咗個凹位, 俾遊客走入去影相, 咁就可以拍到俾d花圍住的效果, 效果真的幾好架! 行了一會, 到草叢中攞番行李, 便回去美馬牛駅了.

Kumasan Family Log House

回到美馬牛駅後, 找了個電話打給我們今晚入住的pension屋主kumasan來接我們, 我們用英文同他講, 當講到美馬牛駅(bibaushi)的英文的時候, 只講咗"bi"的時候, kumasan特然用"純正"的廣東話同我哋講 "美馬牛?" 真是嚇了我們一跳呢, 估唔到他識講廣東話. 等咗一陣, kumasan便駛了他的車來接我們. 好快便到了kumasan的屋, 間屋真是屋型咁架, 全屋用木製成, 有兩層, 屋內有好多熊公仔, kumasan介紹了他的屋同我們的房間後, 仲拿了本他起屋的資料給我們看. kumasan話今晚有二十人入住, 全是香港人. 我們的房間在二樓, 係和式o既, 瞓塔塔米, 仲有個私人露台架, 間房都算乾淨, 不過就唔夠光, 只有一盞燈咋.

7:00準時食晚飯, 晚餐以buffet形式進行, 是kumasan同kumasan媽媽煮的, 食物的份量同味道都ok, 最意外是他整了個有kumasan標誌的燒餅給我們, 很有趣!

食完飯之後Kumasan就了解吓我哋聽日嘅行程, 我地聽日會join佢個car tour遊美瑛, 好似係得我哋join, 真好, 雖然個car tour比搭Twinkle bus貴好多 (都要成HK$二百多元一位), 不過可以睇多好多景點嘛. 食完飯無咩做, 便沖涼瞓覺, 是在香港少有早瞓的一天.

☆赤壁☆

今日與友人食早餐, 之後去看赤壁的早場, 幾好睇, 成套戲好緊湊 (雖然開頭唔係好知d人物邊個打邊個, 睇完之後都有好多嘢問), 另外, 林志玲勁靚. 套戲可惜分開兩集, 赤壁之戰都未做, 想快d睇埋結局.

☆日版花樣少年少女☆

今早一次過煲埋最後3集的日版花樣少年少女, 雖然成套劇o黎講我比較鍾意台版 (因為汪東城演的秀伊實在太搞笑了), 但我覺得日版的結局好d, 因為日版最後中津秀一都知道瑞莃係女仔, 而且表白了, 當然瑞莃同了佐野泉一齊, 但始終講清楚了嘛.

下午開始溫書, 睇咗半份notes就瞓著咗... 不過瞓咗個午睡之後覺得好舒服同精神好多啦.

☆agura lunch☆

今日要返工的, 但約了兩老友到銅鑼灣的agura食lunch, 聽說那裡有個牛肉飯很好食, 上午已期待著. 12:30在中環出發去銅鑼灣, 唔知點解好似離開了中環我便輕鬆了很多, 可能有好朋友一起吧. 餐廳沒滿座, 少了很多西裝人仕, 枱與枱的空間闊了很多 (應該說是正常吧), 比中環的餐廳坐得舒服很多. 到了餐廳發覺沒有牛肉飯, 咪點了個3人餐, 它的兩個主食 - 蟹肉帶子墨魚麵同芝士牛肉什菇pizza都很好味. 與好朋友一邊談天說地, 一邊品嚐美食真是一件樂事.

☆My Friend's Birthday@Discovery Bay☆

今日與友人入了愉景灣慶祝他的生日, 在中環搭船大概20分鐘便到. 碼頭旁便是我們要到的沙灘同愉景廣場. 我們先到沙灘行了一會, 跟住便去愉景廣場. 愉景廣場有很多西餐廳, 下午5點幾, 好多外國人在飲嘢談天, 好悠閒. 廣場其他地方便沒什麼好行, 但竟然有間永安, 我們逛了一會兒.

晚上到ZAKS食飯, 見openrice d comments都ok, 咪試吓, 訂了upstair的位, 原本諗住訂枱會有窗口位, 點知佢話book晒 (可能訂枱時要講埋), 咁惟有坐埋邊. 這裡幾有氣氛, 只是人比較多, 有點嘈.

我們點了青口, 海鮮Risotto同磨姑汁意大利雲吞. 等咗好耐, 叫waiter追, 佢態度好差, 等了大概半個鐘先有嘢食, 好彩d食物好味. 個Risotto好好味, d海鮮都算新鮮. 個意大利雲吞都ok, 可能係自己本身鍾意食意大利雲吞啦.

食食吓, 大概8點鐘, 友人話點解Disneyland那邊咁大煙, 原來係放煙花呀! 好彩無坐窗口位, 因角度問題, 窗口位反而睇唔到煙花啦. 除了d食物太遲來同那個waiter之外, 這間餐廳都不錯, 價錢ok, 應該會再來.

出番中環之後, 去咗ifc的I Scream食雪糕, 要了荔枝同燕麥餅味, 荔枝好好味.

☆粒粒芒果慕士蛋糕☆

今日去學整粒粒芒果慕士蛋糕作為朋友的生日蛋糕. 這蛋糕的製作程序很簡單, 順利的話個半鐘便完成, 不過控制魚膠粉的份量同溫度很重要, 班上有位同學因凝固唔到個蛋糕要重整, 幸好我的尚算成功, 賣相不錯吧. 整完蛋糕, 約了友人到和民試試我的蛋糕, 友人話有90分 (點解唔係100分?), 淡淡的芒果味, 不是太甜, 幾好味.

☆滿樂亭☆

今晚到滿樂亭食晚餐, 這裡裝潢ok. 可能是訂了枱, 他們俾咗張四人枱給我們倆, 所以都坐得幾舒服. 這裡主要食韓國菜, 不過都有少量壽司可叫. 我們點了西冷燒烤、雜錦石鍋飯同韓式麵鼓湯.

西冷燒烤 - 用生菜加點豆板醬夾來吃幾好味, 又好像無咁熱氣.

雜錦石鍋飯 - 這是我喜愛食物之一, 熱騰騰的, 又惹味.

韓式麵鼓湯 - 這個湯一般, 無咩材料.

這餐飯, 不過不失, 但都感覺很滿足.