☆Day 11 台場 > 成田空港 > 香港☆

今日落雨...

下午便離開日本了, 最後一個景點是台場. 我們從蔵前駅搭地鐡到新橋駅, 再轉乘ゆりかもめ到お台場海浜公園駅, 便到台場. 我們準備先去富士電視台. 點知一出お台場海浜公園駅, 發覺外面橫風橫雨, 好凍, 有遮都無用... 個售票處仲係室外, 好辛苦先買到張飛.

買飛才可上去富士電視台於25/F的展望台, 那裡可看到彩虹橋的. 我們上到25/F, 先同彩虹橋影o下相, 跟住攞o左張Stamp Rally, 它除了引導我們遊覽場內設施, 跟著上面的指示沿途蓋上紀念章, 集齊所有紀念章, 可到地下的Information Center攞紀念品. 另外, 這裡仲有個show, 以投影技術整作了一場精彩的音樂會. 最後在這層遇見富士電視台隻狗公仔, 我們馬上捉住佢同佢影相.

跟住我們便往下層參觀, 那裡展示了一些電視節目的介紹﹑照片同場景模型. 另外有一些錄影場地, 如SmapxSmap. 3/F是紀念品部, 無意地發現紀念品部外有檔臨時的Canon counter, 服務員同我們介紹那部正在promote的Canon printer, 部dc駁落去就可以print相, 他說部printer仲可以print月曆, 他仲幫我o地print, 有Winnie the Pooh公仔o架, 仲有個套入住, 好精美. 跟住他又幫我o地影相, 然後傳去部printer度, 跟住可以在張sample相度畫公仔, 再正式印出來, 質素好高, 張相好靚, 估唔到細細部printer可以晒d咁靚o既相, 係呢度都搞o左半個鐘, 好好玩, 那服務員好好人, 又是免費的. 他還說在12:00可同Winner the Pooh影相, 不過我們唔係好夠時間, 所以無等到. 跟住去Information Center攞紀念品, 係富士電視台的面油紙.

諗住走的時候, 俾我o地見到電車男裡面的mina, 即刻走埋去同佢影相, 她仲擺埋pose, 好可愛 : > 佢o地宣傳緊mina套卡通片. 我們走的時候見mina同個工作人員仍然係跳o下跳o下, 擺pose咁, 但係裡面無人喎, 好搞笑.

跟住便去食午餐, 今日計劃食和幸炸豬扒, 咁我o地行天橋過對面的Aqua City啦, 外面橫風橫雨, 好狠狽... 好辛苦先到Aqua City 5/F 的和幸炸豬扒, 這裡的炸物真係超好味, 外面炸到啱啱好, 又唔會好多粉咁, ¥840的炸豬扒定食, d飯﹑野菜同麵豉湯仲係任添, 真係好抵食.

食完飯便到Venus Fort行街, 行o左Burberry同Comme Ca, 不過無買o野lu, 最後係一間舖頭買o左件白色衛衣俾細佬.

跟住搭車番浅草酒店攞行李出成田空港, 搭18:40的飛機, 11點到便回到香港.

這樣便完成了這個北海道+東京的冬之旅lu, 超好玩! 札幌的購物樂﹑白之戀人工場下雪的興奮﹑小樽的浪漫﹑函館的特濃聖誕氣氛﹑大沼公園的優美環境﹑可愛的雪人... 好滿足啊!

☆Day 10 上野ame橫丁 > 新宿Subnade地下街 > 三鷹の森ジブリ美術館 > 銀座☆

上野ame橫丁

明天便離開日本了, 所以計劃今天去上野ame橫丁買手信, ame橫丁可以說是一條手信街, d o野又平. 我們去了有名的手信店 -- 二木之果子, 那裡有勁多手信賣, d o野仲比出面平, 我在這裡買o左d菓子﹑零食同一樽火鍋用的泡菜汁 (用來整泡菜烏冬鍋的). 這裡仲有d店舖在拍賣零食福袋, 好熱鬧的. 在這條街仲見到有d有牌子的運動衫, 超級平.

新宿

見有時間, 便到新宿行o下, 行o左Subnade地下街.

三鷹の森ジブリ美術館

然後便去三鷹の森ジブリ美術館, 在三鷹駅落車, 跟住可坐巴士去美術館 (這巴士的車身是黃色的, 有d公仔印係車身度, 雖然唔係龍貓, 但可說是貓巴士呢), 不過我o地見唔係好遠, 咪行路入去, 行15-20分鐘到. 這個宮崎駿美術館一定要先訂飛, 然後拎張receipt係門口換飛, 而它只可以在10am, 12pm, 2pm & 4pm入場. 我們在香港的JAL訂o左飛, 換o左飛之後, 在2pm入場. 在門口會見到有個龍貓ticket office, 不過唔係o係呢度換飛o架, 影完相便入去.

室內是唔可以影相的, 裡面展示了一些宮崎駿動畫的手稿, 製作理論, 場景等等, 仲有套短片可看, 不過只有日文, 唔係好知做咩, 不過d畫幾靚, 最喜歡宮崎駿畫d風景, 好靚好細緻. 小朋友會多d o野玩, 有架公仔貓巴士, 可以在它身上爬來爬去, 仲有d煤炭硝公仔玩. 睇埋紀念品部便出室外行o下, 影o下相.

室外有間草帽茶屋, 原本想入去食, 但好多人排隊, 只在小食部買o左隻熱狗作午餐. 另外頂樓有天空之城的人物可影相. 其實這個美術館唔係好大, 室內又唔可以影相, 行1-2個鐘就夠.

銀座

跟住去銀座shopping, 行o左博品館﹑Burberry 銀座店﹑MUJI 有樂町店同一些百貨店. 跟住回去浅草食飯, 去o左間食天婦羅的食店.

☆Day 9 大沼公園 > 函館空港 > 羽田空港 > 浅草☆

大沼公園

好快便到Day 9, 今天原定6點便起身, 搭7:26的JR函館本線到大沼公園, 點知效錯鬧鐘, 7點先起身, 跟住極速梳洗同食早餐, 結果都趕到. 這架火車只有一卡, 好得意, 慢慢駛的, 在火車內可欣賞美麗的自然風景. 今天的陽光很好, 太陽照射落白雪上, d雪閃"令令", 好靚, 接近大沼公園時, 火車在湖邊駛過, 好靚, 好舒服, 8:10到大沼公園. 一出火車站看見一遍白雪, 很寧靜, 好鄉村feel. 等到8:30, 觀光案內所開門, 入去拿了地圖同問了服務員怎樣去白鳥台同山川牧場, 她還介紹了我們去巡島小徑. 從案內所行到白鳥台大約15分鐘, 在冬天的時候, 白天鵝會游到這裡, 加上平靜的大沼湖和猛烈的陽光, 簡直是心曠神怡. 現在相信還未夠凍, 遲些應該會有更多天鵝游到這裡.

原路回去案內所的時候, 看見雪地上有我們來時的腳印, 很有趣.

跟住去大沼公園的巡島小徑, 這個大沼湖有81個小島, 都種滿樹木的, 大部份小島之間都有不同的橋連接著, 每條橋都有自己的名字, 這就成了這條巡島小徑, 在這裡散步, 十分寫意, 在橋上可看到結了冰的湖同一個一個的小島, 環境優美. 不過開始的時候, 我們走錯路, 爬上了一個小山丘, 想起來當時都有小小危險, 那個小山丘佈滿枯樹的...

行到巡島小徑的未段竟然俾我o地看到一個雪人呀, 我們當然立刻走埋去同佢影相, 佢好得意呀, 我仲借o左我的冷帽俾佢影相.

這條小徑行o左大約1個鐘多. 跟住便去山川牧場, 旅遊書話這個牧場d牛奶好好飲, 案內所的服務員說從大沼公園去山川牧場要大約20分鐘, 但其實山川牧場o係好遠好遠, 我諗我o地快步都行o左30分鐘, 同埋去到無o野睇, 買o左一樽牛奶, 一樽咖啡牛奶便走, 價錢同出面一樣, 仲搞到趕唔到11:59的普通火車, 要俾多幾百yen搭特急火車...

架特急去到五稜郭公園駅, 唔知點解(可能見好多人落車), 我以為到o左函館駅, 我們跟o左人o地落車, 落o左車之後, 大家都知...落錯車! 但架特急已經開走o左, 我o地立刻搵時間表睇o下下一班車係幾時啦, 等陣仲要搭飛機o架, 正當我們研究緊個時間表的時候, 有位好心的車長可能見到有兩個人落o左車後又唔走, 就走埋o黎問我o地做咩, 我o地便指住旅遊書的"函館"兩個字同說"Hakodate(函館)", 他就幫我們check時間表, 好彩下一班車都不是太晚, 今次真係太失策...

趕快回東横イン攞行李到函館駅出面搭機場巴士去函館空港, 架巴士好細, 無行李位, 其他人都望住我地, 點解咁多行李o既?! 相信車上大部份人都是日本人來函館渡假, 所以都很輕便. 好快便到函館空港, check-in之後, 心才定了些, 在機場搵o左間餐廳食o左個set lunch, ¥1,000有個天婦羅烏冬鍋, 又有o野飲, 算幾抵食. 要搭飛機離開北海道了...

浅草

個半鐘頭的飛機便到東京的羽田空港, 然後坐東京モノレール轉地鐡去浅草, 今晚入住東横イン 浅草駒形, 今次東横イン 的小禮物, 我選了一個旅行袋用的鎖, 放低行李後, 我們便出去逛逛, 行了浅草的名勝 -- 雷門﹑仲見世通同浅草寺, 因為大家都來過浅草, 所以好快行晒, 然後行埋ROX百貨店, 裡面有間RIO o架. 之後見到和民, 便決定今晚在和民食晚餐, 今日係平安夜麻, 要慶祝一o下, 點了好多o野食, 好滿足啊.

☆Day 8 五稜郭公園 > 函館朝市 > 元町 > 函館山 > 金森倉庫群 > 函館Christmas Fantasy > 西波止場☆

五稜郭公園

今日7:30起身, 在東横イン食了些飯團便出發. 今日會多次搭市電, 所以先到JR函館駅的觀光案內所買市電pass, 服務員仲話我o地知個pass可以享用的優惠, 包括買五稜郭Tower同函館山纜車的票會有9折, 我o地都可能會去呢, 她d英文好好o架, 問o野好方便. 其實案內所都有以上兩個景點的9折coupon攞, 唔一定要買pass o既. 我們在案內所拿了些地圖同蓋了紀念印章便正式出發. 市電站離JR函館駅不遠, 大約5分鐘的路程, 等車的時候又見到架公仔市電啦, 都幾得意.

在五稜郭公園前站下車, 行o左大約15分鐘 (原來五稜郭公園距離五稜郭公園前站都幾遠), 到今日第一個景點五稜郭公園, 這個公園是呈星型的, 有條護城河圍住, 內有棟五稜郭Tower展望台, 可以見到整個星型的五稜郭公園. 看旅遊書說春天的時候, 公園內種滿櫻花, 在上面看會很美, 不過在冬天就沒有了, 所以我o地無上去. 我o地在公園內行下, 點知行行下落雨 (好彩我o地都差不多行完), 我們立刻回去五稜郭Tower地下的紀念品店避雨同睇o下有咩賣. 這個紀念品店頗大, 我買o左張拍出了五稜郭公園呈星型的postcard, 好精美o架. 店內仲有紀念印章蓋o架. 等o左一陣見細雨o左便離開, 行o下行o下發覺已經由落雨變o左落雪, 又落雪啦!!

函館朝市

五稜郭公園之後, 我o地搭番市電回函館駅前去函館朝市食lunch. 函館臨近海邊, 所以函館的海產又多又新鮮, 函館朝市內有好多大大小小的商店, 大部份是賣鮮魚, 海產乾貨同北海道特產, 有檔仲係即釣即食魷魚剌身, 見d人都玩得幾開心咁. 這裡仲有好多食堂, 我們選了いくら亭, 它有d定食, 我選了燒銀鱈魚定食, 朋友點了些壽司定食, 這裡的壽司比香港的便宜同超新鮮, 從壽司o既顏色就可以睇到,大家食完都好滿足. 我們住的東横イン就o係朝市隔離, 我o地番去攞番把遮, 再搭市電去元町一帶.

元町

元町一帶仍保存著極富外國色彩的領事館, 教堂同住宅, 另外仲有傳統日本的建築物. 我o地看了東本願寺函館別院﹑函館東正教會﹑元町日和館﹑舊函館區公會堂同舊英國領事館. 它們都好有特色, 途中仲經過好多"坂", 日文"坂"是斜坡的意思, 當中的八幡坂是非常靚, 兩旁有些枯樹, 從斜坡頂可望見函館港, 影相勁靚.

我o地愈行愈大雪, 雖然有點難行, 地下好滑同好大風, 不過係咁大雪先影到雪景.

函館山

函館, 與香港及拿波里被評為世界三大夜景的. 原本打算今晚才去函館山睇夜景, 但見這裡4點便日落同而家其實幾近上函館山的纜車站, 便決定先上函館山. 我o地去到纜車站, 那位售票員拿了個牌出來, 上面用英文寫住因落雪關係, 可能睇唔到函館夜景, 但我們一場o黎到, 便決定都上去看看啦. 我們show了那個市電pass, 以9折買o左纜車飛上去. 架纜車很大, 相信可以載幾十人, 不過可能因天氣唔好, 我地架車都不是太多人, 纜車慢慢登山, 景色慢慢被白雪蒙住, 漸漸咩都睇唔到... 上到山頂, 有個展望台, 一樓有d櫈俾你坐係室內睇夜景, 二樓有餐廳同紀念品店, 在這裡看到有函館出名的山川牧場牛奶賣, 不過我們明天會去山川牧場, 決定去到先買, 再上去就係露天的展望台, 有個函館山的標誌, 不過外面好凍, 影o左相後, 我o地便回一樓等入夜. 坐到4點幾, 天開始黑, 人亦開始多了. 我們等緊o既時候都是看看旅遊書, 計劃之後的行程, 坐坐o下, 坐隔離的男士突然同我o地講"みて﹑みて" (睇o下﹑睇o下), 他指著玻璃外的景色, 一點一點的燈火從白霧中慢慢明亮, 然後範圍愈來愈大, 慢慢開始看到扇型的函館夜景, 雖然這個夜景帶點霧, 同名信片的函館夜景差很遠, 但看到個扇型已經好好了. 不過我覺得函館的夜景比較平面, 香港因有好多高樓大廈, 夜景是比較立體, 靚d. 在室內坐多一陣, 我們決定捱一陣凍出外面看夜景, 出去看是看得清楚d, 不過真係好凍 ~_~

金森倉庫群 & 函館Christmas Fantasy

跟住搭番纜車落山, 然後經過基坂, 它亦是一條斜坡,聖誕節的關係, 兩旁的樹都掛滿燈泡, 好浪漫. 行o左10分鐘便到金森倉庫群, 這裡和小樽運河一樣, 以前是貿易港口, 現將倉庫改成購物及飲食的地方, 這裡的倉庫群都以紅磚建成, 向著函館港, 晚上仲會開燈, 更顯浪漫. 每年的聖誕, 這裡仲會舉行函館Christmas Fantasy -- 於倉庫外擺放一棵巨型的聖誕樹, 下午4:30會開燈, 到5:45會先熄燈, 於6點的時候, 聖誕老人用鹿車載著預先在網上選定的觀眾上台準備亮燈, 那兩位觀眾先講了感受(講日文, 聽唔明), 跟住所有人一齊倒數 "じゅう(10)﹑きゅう(9)... さん(3)﹑に(2)﹑いち(1)", 然後那位觀眾亮燈, 配著Last Christmas的音樂, 聖誕樹便慢慢亮起來, 之後仲放煙花添, 成個活動好簡單, 但包裝得好好, 感覺浪漫, 今日仲係23/12, 聖誕氣氛更濃.

看完這個節目, 便往倉庫群的明治館, 那裡有玻璃製品同龍貓的精品賣, 我買o左一條水晶雪花頸鏈, 好精美, 另外仲行o左海洋館, 裡面有個Chirstmas Square, 一年365日都賣聖誕精品, 那裡仲有個郵箱, 寫好postcard同貼好郵票之後, 放在這個郵箱, 張card就會在最近的聖誕節寄出o架, 幾得意.

西波止場

金森倉庫群隔離便是西波止場, 那裡有幾個很大的海鮮市場, 有各式各樣的急凍海產, 當然有長蟹腳, 仲好勁添, 另外仲有北海道各地的菓子禮盒, 函館出名魷魚, 我就在這裡買了幾包魷魚絲. 西波止場仲有好多餐廳, 有d仲係對住函館港, 氣氛好像很好的, 不過我們沒有在這裡食晚飯. 我們回去東横イン隔離的迴轉壽司食, 可能太晚, 我們去到的時候, 店內一個人都無, 點了一個定食加些壽司, 食物來到的時候, 看見那些壽司的樣子已覺得它們不新鮮, 和中午的差很遠, 而且很貴, 我們都不是食得很飽, 以後一定不會再來, 草草食完之後, 便回酒店.

☆Day 7 登別地獄谷 > 登別熊牧場 > 登別伊達時代村 > 函館☆

登別地獄谷

今日6點起身, 7點落去食早餐, 早餐都係buffet形式, 都ok架, 食完便check-out. 但他們只可以幫我o地keep行李keep到中午12點, 所以要早d番o黎拎行李... 我o地先去地獄谷拍照, 白天看果然是比較靚, 見到d蒸氣從火山口噴出來.

登別有三大遊樂設施 -- 登別熊牧場(¥2,520), 登別伊達時代村(¥3,500)及登別Marine Park(¥2,300), 因時間關係 (登別的主要交通是巴士, 而d巴士都幾疏, d遊樂設施又收得早, 1日的時間要玩得輕鬆, 只可3選2), 我們選了去登別熊牧場同登別伊達時代村.

登別熊牧場

這個熊牧場在山上的, 要先步行上去纜車站 (或者坐吊椅, 不過看網友說吊椅距離地面很近, 對腳可以點地, 路程亦很短, 我o地便行上去, 慳番¥300), 步行10分鐘到到纜車站, 買了外國人2館通行劵, ¥3,000可玩晒2個遊樂設施, 抵好多o架 (外國人3館通行劵就¥4,300). 個纜車都ok, 可看到登別市, 纜車下是高高的樹和白雪, 都靚o架.

牧場內養了巨大的棕熊, 牠們當看見遊客的時候, 便會站起來拍手, 等你拋食物給牠們, 可在小賣店買¥100一袋的生果或零食給牠們. 除o左係橋上面睇之外, 仲可以行去地道看, 那裡同d熊只有一幅玻璃之隔, d熊行埋o黎會好有壓迫感. 熊牧場內仲有個熊之博物館, 展示有關熊的歷史, 生活習慣等, 而屋頂有個瞭望台, 可眺望支芴湖, 頗優美的.

另外, 還看了鴨子賽跑同松鼠屋. 牧場的紀念品店有好多熊出沒注意的精品賣o架. 看完便搭番纜車落山, 然後回酒店攞行李搭巴士到登別駅.

登別駅是一個很細的車站, locker不大亦不多, 一格只是剛剛放得落一件行李, 要租多個細locker先夠, 租locker都用o左¥650... (可惜第一滝本館只可以幫我o地keep行李keep到12點)

登別伊達時代村

放好行李便搭巴士上番山到登別伊達時代村. 伊達時代村是依江戶時代的街道同房屋而興建的, 工作人員都穿上了日本古裝, 我們一去到門口已經見到有位穿了日本古裝的工作人員在迎接遊客, 我們當然邀請了他和我們合照. 這個伊達時代村其實都有d荔園feel, 好冷清, 沒有日本人去的, 只有幾團香港同韓國團, 而d設施又有d舊. 看伊達個網頁同blog, 說這裡最精彩的是忍者show, 日本傳統文化劇場, 貓髻劇場, 忍者怪怪迷路名同妖怪小屋.

我們先找了間食店食lunch, 跟住便去看貓髻劇場, 睇網頁形容, 好似係真人show, 點知去到一個人都無, 無工作人員, 無觀眾... 行行o下見到有個劇場播緊套好似超人卡通片咁, 但主角變o左隻大貓在打怪獸... 唔知做咩... =_='

跟住去o左睇忍者表演, 開場時d忍者從屋頂爬出來, 然後又表演o下飛標, 都算精彩. 之後玩o左忍者怪怪迷路, 其實只係d鏡做出來的錯覺, 令人覺得迷路, 得啖笑啦. 玩埋妖怪小屋便去看日本傳統文化劇場.

原本以為這個show講歷史會很悶, 入到去工作人員見我o地係香港人, 俾o左張中文的故事大綱我o地, 原來這個show係講幾位花魁的故事, 很輕鬆的 (其實都有d無聊). 花魁d和服好靚o架. 觀眾方面, 後來有一團韓國團來了, 場面立刻熱鬧起來. 這個show仲會邀請一位男的現場觀眾上台參與表演, 那些韓國人都幾踴躍, 最後仲要猜包剪揼決定誰當選, 那位選中的現場觀眾仲載晒假髮, 換晒衫上台表演, 他仲好投入, 好搞笑, 大家都好開心. 最後可以同花魁拍照o架. 睇完這個show再周圍行o下便搭16:01巴士離開, 返回火車站.

到火車站的時候都已4點鬆d, 立刻買飛同o係lockers攞番行李, 趕16:11的JR特急Super北斗火車去函館, 好趕, 仲要個月台o係另一面, 要拎住d行李上天橋過對面... 去函館需要大約兩個半小時, 我們買o左自由席的車票, 好彩唔係太多人搭, 自由席都有位坐同擺行李, 一上車就訓lu, 搭o左差不多兩個小時, 應該差唔多到的時候, 火車突然停下來! 一段日文的廣播後, 見大部份人都在下一站五稜郭公園駅落車, 但又有d人坐o係度. 我們諗程車咁貴, 又唔知而家係邊, 天又黑又多行李, 都係等下先. 我們問過一位坐附近的年青人, 但不知他是聽唔明我o地講咩定係佢都唔知咩事, 他無咩回應. 最後終於搵到個職員問o下, 話我o地可以坐o係度等, 但可能要等一段長時間, 我o地咁多行李又唔識路, 惟有等o下啦. 坐坐o下有位太太行到我們o個卡, 後來仲和我們交談, 不過後來她知道我們不懂日文, 就沒和我們多講了. 坐o左半個鐘後, 又有廣播, d人又落車, 今次仲好似落晒, 正當我們唔知點o既時候, 那位太太示意叫我們一起下車, 好像JR方面有巴士載我們到函館, 她實在太好人了, 不過我們大包小包咁, 又要上落樓梯, 好狼狽 *_* 最後都趕到巴士, 坐o左10多分鐘便到函館駅, 兩位車長在下車的位置向每位乘客道歉.

函館

去到函館都7點幾lu, 比原定時間18:24晚了些. 一下車便看到東横イン 函館駅前朝市, 太好囉! 格局和札幌的東横イン差不多, 又係有禮物送, 今次我選了一個匙扣. 安頓好之後便出去食晚餐, 函館沒札幌那麼熱鬧, d店舖都差不多close晒, 街上亦很少人, 只有些居酒屋開了, 行行o下見到架市電, 是聖誕特別版呢, 成架車紅色的, 有個聖誕老人公仔係車身度, 仲掛o左d聖誕燈飾, 好靚o架. 跟住見到有笑笑屋, 便決定食呢間, 個餐牌好像同香港的不同, 我們點了一個烏冬鍋同d小食, 食物一般la. 食完o野見沒什麼地方行, 便回酒店.

☆Day 6 札幌百貨店 > 第一滝本館 > 登別地獄谷 > 溫泉街 > 浸溫泉☆

購物! 購物! 購物!

今日是在札幌的最後一天, 要好好把握購物的機會! 昨晚和朋友商量好今早各自行動, 我就去o左狸小路商店街﹑丸井今井﹑西武百貨店﹑loft﹑Apia地下街﹑Stellar Place同大丸百貨店, 買o左2個袋, 幾件衫同一些手信.

購物之後, 便一起去大丸買便當準備等陣上車食的. 跟住便趕回東橫Inn攞行李去Sapporo Century Royal Hotel搭今晚入住的溫泉酒店 -- 第一滝本館的free shuttle去登別. 車上有日本人, 有香港人, 好像都滿晒坐 (坐呢架shuttle bus要預約o架). 我o地上o左車就立刻攞個便當出o黎食, 跟住便訓覺lu, 因為都要2個鐘才到登別.

第一滝本館

大約4點鐘到了與札幌的感覺完全不同, 富鄉村氣息的登別. o架車就停o係第一滝本館門口, 落車後到counter check-in. 我o地book o左間日式的房間(連dinner buffet+breadfast), 頗大, 房間仲準備好綠茶茶葉同熱水可以沖茶飲, 仲有個菓子, 俾你休息陣. 不過我們放底行李便立刻出去, 因為雖然只是4點幾, 但係天都開始黑.

登別地獄谷

我們步行去酒店旁的登別地獄谷, 沿途有d魔鬼同狼牙棒, 是登別的特色. 地獄谷是火山口遺跡, 有大量水蒸氣湧出來, 但因為天已黑, 所以拍不到照, 決定明早再來, 行埋紀念品店便去溫泉街.

溫泉街

溫泉街主要是賣手信, 有一間叫貴泉堂, 好多賣o架, 仲開到10點添, 有好多係登別限定, 例如有登別拉麵﹑鬼神Kitty﹑熊出沒注意的商品. 另外, 溫泉街有座閻魔堂, 內有座閻魔大王像, 他會由慈悲的臉變至憤怒, 8點會有一場, 所以我o地先回酒店食dinner buffet.

回到酒店的時候見到很多人已穿上酒店的浴衣啦. 這個dinner buffet都好多o野食, 有蟹腳刺身﹑燒蟹腳﹑刺身﹑魚生飯﹑燒牛柳﹑冷麵﹑熱食﹑頭盤﹑甜品等等... 好豐富的晚餐呀!

食飽後到酒店的紀念品店買o左包第一滝本館溫泉粉, 可以返香港再浸. 跟住再去溫泉街的閻魔堂睇變臉, 都頗有趣. 之後再去貴泉堂行o左陣便回酒店.

浸溫泉

返到酒店, 原來已經有人幫我o地鋪好被鋪, 仲鋪得好似好舒服咁, 開頭以為要自己搞 :p, 我o地沖o左d綠茶飲, 食o下菓子, 好好味, 好嘆. 沖埋涼換了浴衣便去浸溫泉. 今次係我第一次浸溫泉, hohoho~~ 第一滝本館的男湯同女湯分別都有室內同室外溫泉, 室內的仲係24小時開放, 室內女湯大約7, 8個池, 有d好熱, 有d是凍的, 有個係訓o係度浸的, 有個係美肌之湯, 有個泡泡池, 都幾得意, 幾好玩, 因為浸的時候都差不多12點, 所以都不是太多人, 可以一個人一個池, 浸o左大約20分鐘, 浸完好像將呢幾日旅行的疲勞消除了些, 沖身後便回房訓覺, 好舒服啊!!

☆Day 5 小樽音樂盒堂 > 夢之音 > 童話交差路口 > 北果樓 > 六花亭 > 北一硝子 > 小樽運河 > 壽司屋通 > 小樽大正硝子館 > 小樽運河(黃昏景) > 銀之鐘1號館 > Wing Bay Otaru Outlet☆

今日7點就起身, 食完早餐便到JR札幌駅坐函館本線到南小樽駅, 好彩選了右邊坐, 因為差不多到小樽的時候, 架火車會經過日本海, 火車在海邊飛馳, 一望無際的海在陽光的照耀下好靚, 覺得好舒服.

我終於來到小樽啦♡~~

小樽音樂盒堂

JR南小樽駅是一個很小的車站, 出閘時都只是由站長收票. 出o左站之後有點迷失, 不知怎麼走, 原來出站後向海行, 見到左手面有條大斜路時, 便轉落大斜路, 行完條斜路就到小樽音樂盒堂. 小樽是我今個trip最想去的地方, 而小樽音樂盒堂便是小樽當中我最想去的地方之一, 呵呵~~ 如想像中一樣, 一入這裡便已感到很浪漫♡♡


這館都播著音樂盒的音樂, 加上像星星的燈飾佈置, 同面前有無數不同款式, 但個個都很精緻的音樂盒, 好有童話feel o架♡ 這裡的音樂盒款式多到... 有玻璃製的﹑有木製的﹑公仔形的﹑掛牆的﹑手動的... 音樂的種類都好多, 如宮崎駿﹑Smap﹑Kinki Kids... 3/F仲有音樂盒製作工場, 可以製作自己的音樂盒, 工場內還有位會說普通話的售貨員呢. 而我的音樂盒呢, 歌曲選了Smap的夜空的那一方, 飾物方面, 我選了小天使, 聖誕樹同屋仔, 仲加了白雪(混合了透明及白色的碎玻璃), 紀念我聖誕節來過小樽, 好開心啊♡ 製作完交給售貨員, 她會待音樂盒乾了後幫我包好它的, 等陣番o黎攞就得o架啦. 就在這裡看呀, 製呀都花了差不多兩個小時, 嘻嘻.

小樽音樂盒堂門外有個蒸氣時鐘, 每15分鐘報時一次, 報時時會有d蒸氣跟住音樂嘖出來o架. 跟住我o地去o左小樽音樂盒堂2號館, 這裡亦是賣音樂盒的, 但就高級些, 手工更精細. 這裡在10:00, 12:00, 14:00同18:00會有現場演奏, 免費的, 我們欣賞了12:00那場, 有一位服務員為我們啟動了幾部大型古代的音樂盒, 那麼大... 但d音色仍然很柔和同保養得很好, 可說是大開眼界, 但當時竟然沒有其他觀眾...

夢之音

跟住我o地先回去小樽音樂盒堂攞番我個音樂盒, 然後去o左隔離的夢之音. 夢之音主要係賣公仔音樂盒, 如Winnie the Pooh, Mickey Mouse, Hello Kitty咁, 門口有佢o地的公仔可以影相o架.

童話交差路口

夢之音同小樽音樂盒堂對出的十字路口便是童話交差路口, 這個...其實只係一個十字路口, 但周圍播住d音樂盒鈴聲, 係浪漫d o既, o係小樽係要改番個浪漫d o既名.

北菓樓, 六花亭

跟住沿著堺町通一路行, 兩旁有很多商店及食店, 當中有北菓樓, 它的千層蛋糕好像十分出名, 即場烘焗的. 這裡差不多所有菓子都有得試食, 我們都逐一試食, 發現這裡有一款小樽限定的蘋果蛋糕超好味, 好有蘋果味, 我們基乎不願離開那試食區呢 :p

北果樓隔離便是六花亭, 也是賣菓子的, 它出名的有奶油三文治同草莓朱古力, 我已在狸小路商店街買o左草莓朱古力(朱古力或白朱古力包住一粒士多啤梨), 所以好快就行完這裡lu.

繼續沿著堺町通行, 見到有玻璃製作工場, 我們便走入去看看, 有些遊客正在燒玻璃, 好像好好玩咁.

北一硝子

行o下行o下便到了北一硝子, 北一硝子有好多個館, 我o地去o左5號館, 賣音樂盒的, Gallery賣杯碟同d玻璃小擺設, outlet, 同3號館. 3號館有六層雪糕賣, 即是有六種味道的雪糕 -- 薰衣草﹑vanilla﹑夕張蜜瓜﹑綠茶﹑朱古力同牛奶, 因為太大支, 我o地叫o左支special, 都是六種味, 不過每種味只佔半層, 好好味, 好滑, 特別喜歡薰衣草﹑夕張蜜瓜同綠茶味. Yummy~~

小樽運河

食完雪糕, 便到小樽的代表 -- 小樽運河．原本為出入口而興建的運河及倉庫，現在已改為商店及散步道．冬日的運河－－白雪覆蓋了倉庫的屋頂同散步道，加埋靜止的河水，好寧靜．運河旁有位伯伯在售買他的運河玻璃畫．在夏天，好像會有不少藝術家在這裡擺檔，但是在冬天，就只有這位伯伯了． 聽說黃昏的小樽運河是最靚最浪漫的, 我們打算黃昏再到小樽運河喔 ^.^

壽司屋通

行埋小樽運河都２點幾，係時候食ｏ野，小樽有條壽司屋通，集合了好多間壽司店，我們選了旭壽司．在這個時間沒有太多人，我們坐那邊只有另一對香港人．我們都點了壽司ｓｅｔ，每ｓｅｔ有１０款壽司，包括三文魚籽﹑海膽﹑蟹腳﹑拖羅等，雖然我不太好壽司，但都覺得這裡ｄ壽司好新鮮，幾好味，個ｓｅｔ仲有麵豉湯～～我們差不多食完的時候，那一ｐａｉｒ香港人送了一張夕張蜜瓜味雪糕的ｃｏｕｐｏｎ給我們！我們說謝後把那ｃｏｕｐｏｎ給服務員，服務員便拿了雪糕給我們，夕張蜜瓜味的雪糕真是很好味啊，而且是免費呢！

小樽大正硝子館

食完ｏ野便行去小樽大正硝子館，這裡主要售賣玻璃擺設同玻璃珠，仲有個創作硝子工房．我在這裡選了一些玻璃珠來製作頸鏈．這裡ｄ玻璃製品真是很精緻啊！

小樽運河(黃昏景)

都差不多４點的時候，我們便再到小樽運河，黃昏的小樽運河便是我另一個在小樽最想去的地方．果然沒錯，藍藍的天空, 加上剛亮起的煤氣燈倒影在運河上, 好像一幅畫, 好浪漫♡♡

行完小樽運河, 見有時間, 便到運河對面的小樽運河食堂行o下, 裡面除了食店, 還有一條初戀商店街賣手信同d日本小玩意, 不過這條街不是太大, 沒什麼特別. 小樽運河附近仲有出拔小路, 又係有好多食店o架.

銀之鐘1號館

跟住便向南小樽駅的方向回去, 去銀之鐘1號館食tea. 途中經過番北菓樓, 我們便再入去試食, 那蘋果蛋糕真是好好味! 銀之鐘1號館是間cafe, 可以挑選自己喜歡的杯, 在店內飲完o野後, 可以洗乾淨拿回家留念. d杯都印了"銀之鐘", 是銀之鐘限定o架, 我選了Hello Kitty玻璃杯, 一set有齊杯碟同盒俾你o架, 仲有件蛋糕送, 熱飲是無限添飲的, 而凍飲可添飲1次. 仲有, 2/F同3/F d杯唔同o架. 3/F有些薰衣草的精品賣, 仲有露天茶座, 相信夏天的時候, 在外嘆下午茶, 聽著優美的音樂盒鈴聲, 應該會幾寫意.

Wing Bay Otaru Outlet

去埋銀之鐘, 小樽之旅就差不多完結了, 我們行番條大斜路上去南小樽駅, 搭火車去小樽築港駅, 這裡有個Wing Bay Otaru Outlet, 我o地行o左無印﹑RIO﹑Next Door﹑Daiso ¥100店等等店舖. 今晚我們在那裡的food court食晚餐.

在聖誕節期間, 這裡放o左一棵頗大的聖誕樹在室外, 6pm仲會放煙花呢, 不過我o地去到都過o左6pm lu, 咪影o下聖誕樹囉. 這個outlet有個摩天輪o架, 在火車站月台可以看得好清楚同影到相 (走的時候發覺的).

今天的浪漫氣氛, 加上整o左個音樂盒﹑玻璃飾物同outlet的收穫, 今天真是超開心, 很滿足喔!

☆Day 4 北海道廳旧本廳社 > 時計台 > 電視塔,大通公園 > 狸小路商店街 > 二條市場 > 地下街 (Pole Town, Aurora Town) > 市內商店 > 薄野 > 時計台(夜景) > 北海道廳旧本廳社(夜景)☆

今日大概８：３０起身，到東横インｌｏｂｂｙ食早餐，早餐是自助的，有些飯團（有三款）﹑麵豉湯﹑烏龍茶同咖啡，雖然很簡單，但是免費的，仍然覺得這酒店好物超所值，這裡仲有水機，可以盛番支水先起行．

北海道廳旧本廳社

今日第一站是昨天到過的北海道廳旧本廳社，今日要進內參觀呢，廳社內主要介紹北海道的歷史，如北方四國，我ｏ地行o左一陣便去下一個景點──時計台．點知係廳社附近見到雪印Ｐａｒｌｏｒ（原本打算昨天食的，因食蟹本家太飽，所以無食到），便走進去看看，這家雪印有些手信如白之戀人賣的．我們買了旅遊書介紹的Royce Special雪糕，坐在窗邊的ｓｏｆａ食，又有暖氣喎，好ｈａｅ！Royce Special果然是很滑，很濃牛奶味，好味！

時計台

之後便到時計台，入時計台內要¥２００，睇旅遊書的介紹，裡面好似無咩睇，所以我們沒有入去（但在門口發現電視塔+時計台的套票都只是¥７４０，我們前天買電視塔入場劵都用了¥７００．．．)

電視塔，大通公園


下一個景點是電視塔及大通公園，今次是看日景的，都是夜晚著了燈的電視塔比較靚．

狸小路商店街

跟住便去狸小路商店街，像大阪的心齍橋，主要是賣手信同¥１００店，旅遊書介紹了一間手信店是免稅再９折，真是無介紹錯，老板會問你是不是香港來的，如果是便會給你免稅再９折，仲可以幫你ｐａｃｋ箱，這裡有白之戀人﹑某些Ｒｏｙｃｅ朱古力﹑夕張蜜瓜味的產品﹑多款日式菓子，同小量薰衣草製品，不過這裡沒有六花亭ｏ既ｏ野賣，要在其它手信店買囉．

二條市場

狸小路商店街的另一段是二條市場，二條市場有許多蟹同海膽賣，另外還有許多賣海鮮飯的食店，我們去ｏ左Ｄｏｎｂｕｒｉ茶屋食午餐，我們點了二色丼同丸鮮蓋飯，丸鮮蓋飯賣相很吸引，有五款食物：海膽﹑帆立具﹑三文魚籽﹑蟹肉同蟹肉麵豉湯．在網上ｐｒｉｎｔｏ左ｃｏｕｐｏｎ，仲有一個小食送．

地下街 (Pole Town, Aurora Town)及市內百貨店

食完飯便繼續行街，狸小路附近有地下街Pole Town同Aurora Town，這地下街仲連住多個百貨店，如丸井今井（有agnes b.同Burberry），PARCO（有無印）同４ｐｌａ（有Fancl），可以唔洗出去凍，好ｇｏｏｄ！之後仲行ｏ左BEAMS同Can Do¥１００店，這間¥１００店與其它的有些不同，d產品都幾精緻，我買ｏ左個袋仔．跟住行ｏ左今年五月先開的nORBESA商場，nORBESA頂有個摩天輪（Day 2在電視塔上看到那個），參觀完摩天輪，就繼續行落去薄野．

薄野

在夜晚, 薄野d大廈會著晒霓虹燈, 好容易認, 見到個大樸克牌King的霓虹燈便是薄野, 薄野有條拉麵橫丁, 我們選了旅遊書介紹的滿龍, 點了味增海鮮拉麵, 有蟹鉗﹑帆立貝同蝦, 湯底很濃, 好味! 成碗食晒, 不過其實都幾貴, 都要成¥1,500 (HK$100)碗.

時計台, 北海道廳旧本廳社(夜景)

食完晚飯便回酒店, 途經時計台及北海道廳旧本廳社, 它們在夜晚都會著了燈, 時計台夜晚著o左燈都幾靚, 不過旧本廳社的夜景就沒什麼特別了. 明天便到小樽玩, 很期待啊!

☆Day 3 Sapporo Factory > 蟹本家 > JR Tower > Stellar Place > 大丸 > Paseo > APIA > ESTA☆

今天是package包的酒店的最後一天, 要先check-out, 留了行李給他們待晚上回來拿, 我們食了豐富的早餐同盛了支蘋果汁便出發. 今日第一個景點 or shopping點是Sapporo Factory, 但行去的時候見到北海道廳旧本廳社(Day 4的景點)鋪滿了雪, 便過去看看, 廳社前的花園鋪o左厚厚的雪, 白雪雪, 好乾淨, 而且軟綿綿的, 相信是因昨天下了雪, 廳社的屋頂都鋪滿雪, 襯著紅磚的外牆, 好靚, 影o左不少相. 玩o左陣雪, 好無聊... 哈哈, 但好開心, 廳社內部是開放的, 但我們留待原定的Day 4才看, 現在先到Sapporo Factory行街.

Sapporo Factory

Sapporo Factory以前是啤酒廠, 現在改為商場. Sapporo Factory有五個館o架, 二號館同三號館中間有個圓拱形的玻璃天幕, 下面是花圃, 現在仲放o左棵聖誕樹, 是全日本室內最高的聖誕樹. 另外, 這裡有個煙囱廣場, 保留了啤酒廠的煙囱, 我們去的時候仲裝飾了一位聖誕老人, 很有趣, 真係好似聖誕老人爬煙囱派禮物咁. 一號館有間sanyo生活良品(¥100店), d o野都幾靚o架, 買o左粒星, 可以用o黎掛飾物的, 都只是¥100啊!! 而紅磚館有好多北海道手信賣, 基本上全北海道手信都有, 如幸福海藻球, 熊出沒注意, 薰衣草製品等, 另外還有大正硝子館分店, 有各式各樣的玻璃製品, 但我們當然留待到小樽才買啦.

蟹本家

行完Sapporo Factory都差不多1點, 便到蟹本家食蟹料理, 我們去o左札幌駅前本店的蟹本家, 樓高7層, 全部都是日式獨立個室, 我們自己一間和室, 雖然要除鞋, 但地下有暖毯, 好舒服, 好嘆. 女侍應都穿上和服的. 我們叫了小樽會席同富良野會席, 有蟹肉刺身﹑蟹沙律﹑燒蟹腳﹑炸蟹﹑蟹粥等等, 好美味, 最後仲有雪糕, 我們都選了美味的綠茶雪糕 (沒有蟹味雪糕?!) ^o^ 找數的時候我們拿了昨天拿的coupon出來用, 結果真是有9折, 真好!

JR Tower, Stellar Place, 大丸, Paseo, APIA, ESTA

食完昼就開始shopping lu, 札幌JR駅上蓋有幾個大型商場— JR Tower, Stellar Place, 大丸, Paseo, Big Camera, ESTA, 仲有地下街APIA, 一個下午是不夠行的, 所以我o地重點行o左大丸的Burberry, Porter, Stellar Place的agnes b.同Comme Ca (內有3 minutes happiness), Paseo的RIO, APIA的3 coins, 同ESTA的Uniqlo (Stellar Place 1/F有觀光案內所可以問o野o架). 我今天當然有收穫啦, 買o左幾件衫, 另外係Big Camera外免費攞o左張有日本地圖的月曆, 都幾精美o架.

跟住便到ESTA的10/F, 有個札幌拉麵共和國, 裡面有數間拉麵店, 我們選了一間, 食o左海鮮拉麵連杏仁豆腐, 都ok. 這裡佈置得像日本舊時的模樣, 就好似銅鑼灣的拉麵橫丁咁.

食埋o野都10點, 要回札幌華盛頓第二酒店拿行李到東横イン 札幌駅北口check-in, 這間東横イン幾近札幌駅的. 第一次住東横イン, 正如眾網友所言, 東横イン超整潔, 我立刻想起有位網友說 ‘真是有又平又靚的酒店’, 我很有同感啦, check-in時除了有d mask, coffee, hair band等 送俾我o地之外, 接待員仲叫我o地選件小禮物, 我選了東横イン電話繩.

☆Day 2 北海道神宮 > 白之戀人朱古力工場 > 羊之丘展望台 > 26th 札幌白色燈樹 > 札幌慕尼黑聖誕節集市 > 電視塔,大通公園(夜景)☆

今日的行程好豐富, 所以今日7點就起身, 同返工差唔多… 不過心情當然好唔同啦. 7點半落地下食早餐, 都幾多o野食, 有炸魚柳、炒蛋、煙肉、粥、麵豉湯、紫菜、生果等等, 仲有呢道d蘋果汁超好味, 好似真係蘋果搾出o黎咁. 我o地仲盛了一支走 :p 這頓早餐都食o左45mins, 太多o野食喇~~~

食完早餐便到札幌站搭地鐡到北海道神宮, 今天預計要多次搭地鐡, 所以決定買地鐡1 Day Card, 同埋這張1 Day Card在星期六及日會由¥800減至¥500, 所以都安排o左今日去晒札幌內要搭地鐡的地方. 旅遊書說各地鐡站售票機有得買1 Day Card, 但我們看看售票機卻以¥800出售, 正在猶疑旅遊書是否唔update的時候, 友人便看到售票機旁有個窗口貼著假日的1 Day Card, 我們便立即同那位職員購買, 可以出發lu!

北海道神宮

在円山公園站落車, 行15mins便到円山公園, 這個北海道之旅的第一個景點 -- 北海道神宮就o係円山公園內. 円山公園好寧靜, 地下, 屋頂同d樹都鋪滿雪, 好靚. 我地影o下相, 玩o下雪, 加上有點融雪, 要慢慢行, 都行o左半個鐘先到北海道神宮.

跟住便在神宮周圍影o下相...

然後便去看紀念品, 點知發現了北海道神宮紀念印章! 好開心呀, 北海道第一個紀念印章, 這個印章都幾靚o架.

白之戀人朱古力工場

行完北海道神宮都已9點幾, 再用1 Day Card搭地鐡到宮の沢駅下車, 行10mins到白之戀人朱古力工場, 我很期待到這個地方呢, 因為看了旅遊書的介紹及照片, 感覺這個地方很浪漫, 它當然沒有令我失望, 先是看到外牆有一個一個小雪人站在窗口, 欄杆上有好可愛的貓仔.

一入到去便見到一間一間好可愛的小屋, 裡面有埋小傢私o架. 跟住行行o下見到有架聖誕老人鹿車, 又走上去影相. 跟住想揾入口去朱古力工場, 點知入o左去一棟賣紀念品的地方, 問o左位售貨員去邊度買入場劵, 見佢講完一輪日文便行開o左, 以為佢唔明我地問咩, 原來佢係行去同其他售貨員講聲, 然後帶我們去入口, 仲要個入口o係另一座, 她沒有穿褸便同我地一起出去, 那時大概只有零度… 她很好人啊! 原來我o地入o黎o既時候掛住影相, miss o左個指示牌, 售票處就係入口的右邊. 售票處有紀念印章, 我們當然又印了, 好開心啊! 入場劵像1本passport咁o既, 仲有一塊白之戀人送.

這裡除了可以參觀白之戀人的製作過程外, 仲可以了解朱古力的歷史同看名貴的古董朱古力杯. 另外仲有個古董玩具博物館. 我們先看看珍貴的歐洲古董朱古力杯, 手工好精緻. 然後往上走一層, 介紹了白之戀人的歷史, 可惜是日文, 聽唔明… 跟住便可以看到現在的白之戀人製作工場, 雖然隔住玻璃, 但都聞到白之戀人的牛油香味, 好似好好味咁. 看見工人將一塊塊朱古力放入部機度, 讓朱古力夾在兩塊烘好的餅中, 另一工人在檢查, 然後包裝, 好快便做好好多白之戀人lu. 再上一層有體驗工房, 可以製作屬於自己的白之戀人.

在這層還有售賣手作的砂糖工藝, 特別喜歡那些砂糖造的小女孩, 真是非常可愛, 手工很細緻. 另一邊是古董玩具博物館, 那裡放o左好多古董玩具, 我o地在那裡休息o左陣, 拿了買入場劵時送的那塊白之戀人出來食, 好美味呀! 最後便回到初初走錯路的紀念品部, 那裡有一棵好靚的聖誕樹, d飾物好靚, 好似係水晶飾物. 我o地無係這裡買白之戀人, 因為旅遊書說狸小路商店街有一間手信店買o野會免稅再9折, 所以便留待Day 4先買.

離開o左紀念品店之後, 在外面的廣場看看有什麼好影的時候, 特然下雪了!! 來北海道的第一場雪, 好開心, d雪掉在手上, 膊頭上, 頭髮上, 仔細一看, 粒雪真是雪花的形狀o架! 第一場雪在這麼浪漫的地方落, 超開心 : ) 在廣場的人都好興奮呀!

離開朱古力工場之後, 回到宮の沢駅, 見到車站旁有間西武百貨店, 於是便入去它的超市看看有咩食, 我o地買o左壽司拼盤同章魚小丸子作午餐, 跟住便搭地鐡到福住駅, 轉中央巴士羊之丘線到下一個景點 --- 羊之丘展望台.

羊之丘展望台

搭巴士的時候見到有些人拿著車票, 好擔心我們搭了霸王車... 好在是原來可以在下車時俾錢. 羊之丘展望台, 顧名思義是看羊仔的, 但現在是冬天, 沒有羊仔看lu, 但仍可以看創立北海道大學的克拉克博士銅像, 他有句名句 "Boys Be Ambitious!" 我們又當然和它拍了不少照片啦, 還學了它的pose黎影相呢 ^o^ 另外仲可以在這裡看到札幌巨蛋. 羊之丘都鋪滿o左厚厚的雪, 雪的遠方有一棵棵枯樹, 好靚, 好有冬天的感覺. 羊之丘的buildings都好靚o架, 都是紅色尖頂的白屋.

羊之丘有個足之湯, 可以泡腳的, 看看後, 我o地入去旁邊的雪祭資料館, 這個資料館介紹歷年的雪祭, 有相片、模型和錄影帶, 也是個取暖的好地方呢! 這裡好像有羊之丘展望台的紀念印章(旅遊書說的), 可惜我們都忘記了... 這個資料館有本免費雜誌攞, 我o地發現裡面有明天會食的蟹本家9折coupon!!! 蟹本家都幾貴, 所以9折都慳不少, YEAH! 這裡還有一座教堂 "羊之丘婚禮廳" 同啟程之鐘, 新人都會拷這個鐘, 相信是代表他們新的旅程要開始了. 我們當然亦有拷這個鐘拍照, 嘻嘻… 之後, 我們便搭回中央巴士到福住駅, 再搭地鐡到大通駅, 步行到慕尼黑聖誕節集市.

26th 札幌白色燈樹 & 札幌慕尼黑聖誕節集市

這個市集今年由22/11至17/12舉行, 所以今日係最後一日, 這個市集都是些木屋小攤檔, 賣聖誕節的飾物, 明信片, 另外賣好多外國小食, 如德國腸, 燒雞, 酒等等, 仲有聖誕老人! 頗有聖誕氣氛o架, 這裡賣的聖誕飾物都好靚好精緻, 我買了一棵鐡製的聖誕樹, 樹頂那棵星星可以clip d卡的, 可能是最後一天, 都減了價 ^o^ 好開心. 今日在外的時間都幾多, 加上愈來愈夜, 我們都覺得愈行愈凍, 看見有間木屋俾d人入去坐o下食o下o野, 我們便入去暖o下, 點知發現那裡有6款postcards可以自由拿的, 仲可以蓋紀念印章, d postcards都好精美啊!

除o左這個市集, 每年聖誕節札幌市會舉行札幌白色燈樹節, 今年已是第26屆, 在大通公園舉行, 在公園內放了多棵燈樹, 好聖誕o架, 行o下行o下仲見到一個音樂表現, 有個女仔彈電子琴, d燈樹會跟著她彈琴的節奏閃o架, 在大通公園行仲可以看到電視塔的燈飾, 五顏六色o架. 行o下行o下便到電視塔.

電視塔, 大通公園(夜景)

在地下買了上電視塔的入場劵, 便搭lift上去三樓轉lift. 電視塔三樓有手信賣, 見到有電視塔之父同佢個friend時計大神公仔賣, 都幾得意, hae o左陣便 轉lift, 一分鐘便上到於90米的展望台, 在這裡看到白色燈樹節下的大通公園, 都幾靚o架, 仲可以看到新落成的摩天輪.

跟住便去食晚餐, 本來打算食迴轉壽司toppi, 但相信已closed, 搵唔到, 但係搵o既時候見到相撲茶屋, 記得旅遊書都介紹過, 便試o下, 這店內有許多相撲的畫喔. 這店是食蟹火鍋的, 我們叫了一個蟹一個雞的火鍋, 等o左一間, 服務員便拿了一大鍋食物同湯底來, 水滾時, 服務員幫我們放d食物落個鍋度, 等多一陣便食得lu, 那些蟹真是很鮮味, 很多肉, 另外d烏冬好滑, 好好味, 在咁凍o既天氣食火鍋真是很嘆呀~~

原本諗住回程的時候, 須便看看時計台同北海道廳旧本廳社的夜景, 但是太凍, 決定留待後天才看, 我們便急步回酒店.

☆Day 1 香港 > 成田空港 > 新千歲空港 > 札幌☆

籌備o左幾個月的北海道之旅今日終於出發lu, YEAH! 我o地搭JAL10:10班機飛去東京成田空港轉機, 飛機餐有咖哩豬扒飯或海鮮飯, 味道都ok, 仲有布甸添, 好味! 於3pm到成田, 要自己攞行李, 再到Domestic o既JAL counter check-in, 跟住o係飛札幌的候機室等o左兩個鐘之後 =_=", 終於可以上18:35飛札幌的飛機, 早知唔咁快入閘, o係機場行下先 (後來睇網友的遊記, 機場內好似有Uniqlo喎). o係候機室的時候, 見天氣報告說札幌在之後幾天會落雪, 好期待啊...

班機都幾準時, 20:15到札幌新千歲機場 (這個機場在今次的trip只出現一次), 飛機一著地, 我便看看有無落雪, 不過太黑睇唔到. 不用check passport, 攞完行李就走得, 我o地可以搭比預計早一班的airport express出札幌市中心 (JR札幌駅), 一出火車站已feel到北海道的凍, around零度. 今晚我們下榻package包的札幌華盛頓第二酒店, 因為天黑, 所以都要揾一陣先揾到 (第二天發覺它其實幾近札幌站呢). 酒店有少許舊, 但算乾淨, 放低行李便出去食o野.

今晚決定食味之時計台, 到味之時計台的時候見門口很多人等緊, 都驚要等好耐, 好彩都唔洗等好耐就有位. 旅遊書說這店出名食醬油拉麵, 我們便點了醬油拉麵及鹽味拉麵 (北海道名物之一), 仲加了一客餃子. 醬油拉麵好好味, 湯很濃, 我可以食晒成碗麵, 鹽味拉麵較清, 餃子就麻麻, 味道怪怪地. 坐係我o地隔離的是兩位日本男仔, 打扮得好型, 有一位將佢幅黑超放o左係碗拉麵的旁邊, 無幾耐, 他們食完便起身走, 那位戴黑超的竟忘了拿他的黑超, 我o地示意叫他們攞番, 跟住大家都笑了, 都幾搞笑...

這是在北海道的第一餐, 好滿足啊! 跟著便慢慢步行回酒店, 酒店附近有間Lawson, 買了一支保礦力準備明天飲用的. 跟住就沖涼訓覺lu.

☆北海道冬日之旅 -- 前言☆

距離去北海道還有一個月，很期待。初初心血來潮plan下去北海道睇花已是七月的事，後來攞唔到假才決定先去看雪(旅遊書都說先看雪後看花是比較好呢)。由初初plan去9日到現在決定去11日，整個行程差不多籌備左五個月，好似好誇張咁，不過對我來說是悶悶地有d o野諗下，我覺得而家的行程表都算完善了。估不到的是原來很多人都會在十二月去北海道，我們十月尾去問機票時已經無晒位，都幾無奈，惟有諗下從東京搭火車上去，好彩第二日去問d旅行社，竟有一間有機位，喜出望外，仲fit到我地個plan，我們便立刻報名，不過後來又因同旅行社有一些誤會要稍改些行程。Book新宿的酒店時同樣有麻煩 -- 滿晒，最後book o左o係浅草, 而家總算confirm晒機票同酒店lu，去程又不用在東京轉機場。在籌備的過程中，睇左好多旅遊書同blog，d相好靚，搞到愈來愈想去。希望十二月不會太大風雪，咁就會是超浪漫的白色聖誕lu!!!

暫定的行程如下:

16/12/06 Sat (Day 1) 香港 > 札幌 〒: 札幌華盛頓第二酒店
17/12/06 Sun (Day 2) 札幌 〒: 札幌華盛頓第二酒店
18/12/06 Mon (Day 3) 札幌 〒: 東横イン 札幌駅北口
19/12/06 Tue (Day 4) 札幌 〒: 東横イン 札幌駅北口
20/12/06 Wed (Day 5) 小樽 〒: 東横イン 札幌駅北口
21/12/06 Thu (Day 6) 札幌 > 登別 〒: 第一滝本館
22/12/06 Fri (Day 7) 登別 > 函館 〒: 東横イン 函館駅前朝市
23/12/06 Sat (Day 8) 函館 〒: 東横イン 函館駅前朝市
24/12/06 Sun (Day 9) 函館 > 浅草 〒: 東横イン 浅草駒形
25/12/06 Mon (Day 10) 上野 > 新宿 > 三鷹 > 銀座 〒: 東横イン 浅草駒形
26/12/06 Tue (Day 11) 台場 > 香港