☆粒粒藍莓鬆餅☆

今日見得閒, 咪攞之前買落嘅藍莓鬆餅粉出o黎整吓. 原本幾成功o架, 就係最尾掛住洗嘢, 唔記得咗睇住d muffins, 焗多咗兩分鐘, 搞到個面有d燶添......

材料:

4個muffins份量　－　家中一人一件啱啱好 :）

藍莓鬆餅粉, 水 45g, 蛋 70g (我用咗1隻蛋, 大約60g), 牛油 56g (座溶)

做法:

1. 將水, 蛋加入粉料中混合
2. 用打蛋器中速 (我用1號) 攪拌4-5分鐘
3. 加入溶牛油拌勻
4. 放入杯中, 焗約25分鐘便成 (應該23分鐘便可)

成個過程加埋洗嘢用咗個半鐘.

☆Valentine's Day☆

2月14日

今晚我和友人到了我們都喜愛的和民慶祝情人節，我買了模型送給友人（原本是神秘禮物，點知之前俾友人問吓問吓問咗出ｏ黎），他送了閃”令令”耳環同音樂盒給我，ｈｅｈｅ. 另外，我昨晚整咗朱古力, 本來諗住今晚有得食, 點知件朱古力雪咗成晚都唔凝固, 惟有等到星期六先送啦.

2月16日

今晚與友人再慶祝情人節, 我早上一早便起床縫埋件蛋糕同睇吓件朱古力雪成點, 點知件朱古力仲係未凝固, 好似糯米糍咁嘅質感, 本來有六件, 我只是切了兩件出來, 其他都掉了. 友人說件朱古力"好食"喎.

友人今晚book了西貢的Anthony's Catch食意大利菜, 間餐廳幾有情調, 紅色的餐桌上都點了蠟燭同放了一枝紅玫瑰. 坐了一會, 侍應便拿了一藍麵包來, 塗上原粒焗的蒜頭, 幾好味, 跟住是網友都推介的忌廉青口, 真係好好味, 個sauce好濃, d青口又大大隻. 之後是龍蝦湯, 味道濃郁, 不過稍鹹了一點, 個湯挺大碗, 飲完都有d飽. 主菜是煎魚同大蝦帶子意粉. 個魚幾好味, 大蝦帶子意粉就普通. 我們都食到好飽. 今晚好開心啊! : )

☆年宵☆

今日下午考完試後, 靚靚心情馬上回復. 先與友人到銅鑼灣的千秋樂食晚飯, 跟住去行年宵, d檔口與往年差不多. 在一檔賣士多啤梨精品的檔口見到個士多啤梨飾物櫃同龜女攬眈都好靚, 但係唔知屋企有無位放那個飾物櫃, 猶疑了一會, 友人可能免得我成日問佢買唔買好, 他便買了給我, hoho~ 可以放飾物lu, 然後我說還有好多空放飾物喔, 呵呵呵!

☆周年@黃金海岸☆

今日與友人入黃金海岸慶祝, 我們先到酒店食lunch buffet, 跟住去咗沙灘行吓, 之後去d檔攤仔看手工藝品, 這兒是個好休閒的地方.

☆成都‧九寨溝之旅☆

今年邀請了家人去了九寨溝, 這次可算是完成了近兩年的目標.

在6日的旅行裡實際只有2日有行程, 不過看了九寨溝的山與水同一齣精彩的川劇都算滿意.

8/1 Day 1

香港>成都

夜機抵成都, 然後回酒店...

9/1 Day 2

文殊廟>九寨溝

朝早行了文殊廟, 中午到內陸機場搭飛機到九寨溝, 大約九個字的機程, 有半個鐘好似玩過山車咁, 都幾驚 =_=" 仲有, 班機delay咗, 所以原本今日會入九寨溝一次的行程取消了... 晚上在酒店看民族表演.

10/1 Day 3

九寨溝

今日入九寨溝, 沒想像中咁凍, 而且有太陽, 好好天. 九寨溝d水真係好清, 而且有幾種顏色, 好靚. 另外, 它的瀑布都好靚.

(五彩池)

(五花海)

(珍珠灘瀑布)

(諾日朗瀑布)

11/1 Day 4

九寨溝>樂山大佛

今日從九寨溝出番成都, 班機沒有delay, 沒有過山車, 很好. 下午去咗今個trip的另一個大景點 -- 樂山大佛, 坐船在江上看的.

今晚入住一間名叫天頤溫泉酒店, 間酒店幾靚, 服務一流, 吃完晚飯休息一會便去浸溫泉 (可穿泳衣的). 那裡有十多個露天溫泉, 環境ok, 不過... 有時會遇到些人好像跳水一樣跳落個溫泉到, 或在溫泉游水, 有次聽到吐啖聲...... 好彩唔係好多人, 都可以搵到d溫泉係靜靜地嘅.

12/1 Day 5

峨嵋山>錦里一條街>川劇表演

今日一早便搭車上峨嵋山, 大約搭了四個鐘頭車去到山腳, 跟住搭纜車上山, 上到山發覺好大霧, 而且正在溶雪, 要著丁鞋. 從纜車站要行一段路到金頂同十方金佛, 穿住對丁鞋, 好辛苦先行到去, 但係太大霧, 咩都睇唔到, 而且好凍, 係呢幾日o黎最凍的.

食完飯後坐番兩個鐘車到錦里一條街. 錦里一條街是一條佈置得古色古香的街, 有好多手工藝店, 手信店同bar. 街尾有一座川劇院, 間劇院都係古色古香的, 今晚就在這裡看川劇, 這川劇主要包括手影戲, 頂火燈同變臉, 真是非常非常精彩, 齣手影戲同變臉真係令全場拍晒手掌同嘩嘩聲. 在那場手影戲, 他們真是可以只用身體(主要是手)做都不同動物的影出來, 那個會眨眼的貓頭鷹真是很厲害. 而那場變臉, 真係變得快到睇唔到. 這次可真是值回票價.

13/1 Day 6

熊貓館>香港

早上到熊貓館看熊貓, 有bb, 幾個月同大熊貓. d bb熊貓真係幾得意.

中午食完飯便上機回香港了.

☆九州之旅 Day 7☆

福岡 (太宰府>天神)>香港

今日便要離開九州了, 早上去了最後一個行程 -- 太宰府. 我們先到轉車站天神鎖好行李, 然後再搭火車去太宰府, 在火車上已經覺得奇怪點解咁多人嘅? 去到太宰府發覺係勁多人, 可說是人頭擁擁, 幾日來好似沒有一個景點有咁多人, 聽說太宰府的天滿宮求學業好. 之後去咗太宰府內的小食店, 我們吃了客小丸子, 今次的小丸子好特別, 每粒都有原隻八爪魚仔喺入面. 跟住我們行咗光明禪寺同埋通往太宰府的街兩旁的店舖, d店舖都賣著很多日式的精品.

之後見"順路"去咗天神, 當日的天神真是有點誇張, 好多人, 人人都攞住一大袋的福袋, 有d拉埋福喼, d商場只有一個方向行, 有d舖頭仲要排隊, 就好似年三十行花市咁旺, 好厲害. 在友人的"鼓勵"下我都迫到入去買衫, 真係幾平嘅 : )

中午的時候到天神地鐡站的locker攞番今朝鎖咗嘅行李. 嘩! 一攞件行李出來, 即刻俾人霸咗個locker放他們的戰利品. 跟住便出機場了, 在機場吃了午餐, 班機大約五點鐘到達香港.

**************************************************

今次的旅行沒上年去北海道咁多嘢玩, 而且車程實在太多, 又要早起身, 同要常常轉酒店 (因要善用那個火車pass), 如果可以分開兩次去九州的話應該會比較好. 不過去咗豪斯登堡, 我覺得它的「光之街」真係好靚, 好浪漫, 同埋住咗間靚靚酒店, 所以對今次旅行我覺得好滿意!

(為友人呈獻)

☆九州之旅 Day 6☆

福岡>長崎 (山王神社>平和公園>長崎原爆資料館>豪斯登堡)>福岡

今日是我們的5 day pass的最後一日, 所以今日會去埋長崎, 搭了兩個鐘頭火車到達浦上, 再轉電車到山王神社. 山王神社因原子彈的投落所以只剩下半邊.

跟住去咗平和公園, 原子彈投落點及長崎原爆資料館看看歷史, 都是很值得去看的地方.

下午到豪斯登堡, 豪斯登堡是一個仿照荷蘭建築物起的樂園. 我在計劃行程的時候以為現在已無人去豪斯登堡了, 到了發覺唔係呀, 都有幾多人去o架. 之前在網上見到豪斯登堡在聖誕期間會有個「光之街」的活動, 即是在園內佈置晒燈飾及聖誕樹, 配合歐洲的建築物, 好似好靚咁, 所以都幾期待. 另外, 豪斯登堡在假期好似會放煙花添!

我們買了樂園pass, 在園內的chocolate shop吃午餐, 玩了泰迪熊王國, 艾沙劇場, Kirara, 音樂盒博物館同上了展望台看夜景. Kirara在日本世博展覽過, 是一套講自然環境的影片, 雖然講日文聽唔明, 不過套片加埋鏡的效果, 真係整得好靚. 另外, 泰迪熊王國同音樂盒博物館我都好鐘意, 真係好似去咗童話世界咁.

今日是1月1日, 日本周圍都賣著福袋, 這裡都有, 我買了個啤啤熊福袋喔. 另外仲買了很多手信給朋友同買了個音樂盒給自己, hehe.

晚上豪斯登堡內都開晒燈, 加埋d聖誕樹, 真係幾靚, 後來仲落埋雪, 好浪漫喔! 不過超凍, 同埋d設施6點到就關門, 所以都玩唔晒呀. 八點幾開始放煙花, 都幾靚o架, 今晚真是好開心啊!

因為要趕火車回福岡, 所以沒吃晚餐便上火車了, 搭了個幾鐘頭火車, 回到福岡時已11點幾, 我們惟有買杯麵返酒店食...