♥甜蜜台灣之旅 Day 2♥

化妝姐姐準時7點上到我們的房間, 馬上開始同我化妝, 原本我都準備好了乾濕粉卜, 假眼睫毛同安瓶, 點知她全部都準備好了俾我啦. 另外她聽我昨天說要皇冠襯婚紗, 她帶了很多皇冠黎俾我揀, 同埋她聽我說想要d花仔襯我粉紅色的晚裝, 她自己昨天專登整了一些花仔頭飾俾我, 那些花仔整到真係好襯條裙, 真開心啦. 我覺得她化得幾好, 幾自然, 同個頭set得幾好, 我幾鍾意. 之後, 助手同攝影師都陸續上黎, 攝影師係後生仔黎嘅, 他問我地想要咩風格, 我說要浪漫啦♥

9點幾化好妝便出發, 司機幾細心, 準備了水同飲管俾我地, 用飲管飲唔會整走d唇膏. 出去的時候有點雨... (昨天明明好好天架), 確實有點擔心...

我先著婚紗影的. 第一站本來是陽明山的黑森林, 上到陽明山好大雨...... 真的有點無奈... 加上那個黑森林唔知係咪有人拍緊戲, 欄住咗. 攝影師便跟我們說去另外一個地方拍, 那裡有差不多的景, 我們惟有說好啦, 因為實在太大雨, 好彩黑森林唔係我地最想影的地方. 然後去咗一個湖, 有d荷花架, 這個地方都幾靚, 又無咁大雨喎, 同埋這地方係additional, 唔係原本條路線內啦.

第二站係大屯自然公園, 好奇怪, 到這裡便開始有太陽, 真好, 開心番晒~ 司機見我地將會去一d草叢影相, 便買了蚊怕水俾我, 很好人同細心啦. 攝影師帶了我地到一些樹木中影相, 算是補番黑森林的景, 另外我們發覺這裡有我們常常在別人的婚照看到像路軌的景, 我地都覺得幾靚的, 所以我地request了影, 好開心喔~

第三站是去台灣影婚紗照最想影的景 -- 大屯農場. 真係好好, 去到大屯農場超好太陽啦~ 這農場真是很適合影婚紗照, 花海, 鋼琴, 千秋, 風車都是必影的, 另外最鍾意它有一個景係有條木橋伸出去個湖度, 好靚. 在這裡換了深藍色的晚裝再影了一些相, 她們都說件深藍色的晚裝很靚. 跟住便食lunch.

第四站是風力發電站, 有d大風車, 在這裡影了一些著了婚紗鞋的相~ 走之前在這裡換了粉紅色的晚裝. 轉妝的時候, 助手用我地的相機幫我地影了幾張相, 有一張化妝姐姐仲攝埋入鏡一齊影, 好搞笑. (台灣同香港真的有點分別, 聽說在香港影婚紗照係唔俾自己影相, 要偷拍的.)

第五站是石門幸福廣場, bf在這裡影了一些我覺得幾型的相, 化妝姐姐都話: 好師喔~ (我在旁偷笑)

最後一站是白沙灣海灘, 來到沙灘剛好有夕陽. bf換了casual白色恤衫同牛仔褲. 在最後一站攝影師要求了bf抱起我, 好好玩喔~ 最後我地仲request咗落水影, 玩吓水添~

玩到濕晒同好多泥呢... 好彩司機有流動帳篷俾我換衫. 司機見我地影完相仲買了一些粽俾我地食, 真的好好人呀.

雖然未睇d相, 唔知影成點 (第一次影, 當rehersal啦), 但總括來說今次覺得幾好彩同拍得幾舒服, 要有太陽的地方有太陽, 有夕陽的地方有夕陽, 化妝姐姐好落力同我化妝同補妝, 攝影師ok, 司機好細心. 係助手麻麻地, 想她可以再教我地擺多d pose. 好想快d睇吓d想喔~

影完相, 先回酒店梳洗吓, 便去台北101看看, 食埋晚飯.