昨晚已很緊張, 希望今天不要下雨, 結果朝早挺好天喔, 可以出發lu.
今日是慶祝我的生日呢, 雖然我十月先生日, hehe... 但想去玩米奇「鼠」假大派對, 所以慶祝o左先啦~ 一次奇妙之旅, 要開始囉, hohoho~~
約了朋友8點半在九龍塘地鐡站等, 然後一起去搭迪士尼綫. 雖然不是第一次坐迪士尼地鐡, 但仍然想周圍影相, 結果我們仲搭回頭到欣澳站, 再搭去迪士尼站, hoho~~
去到迪士尼那邊, 天氣好好, 一舊雲都無, 在噴水池影ｏ左陣相便換票入場．入到去當然先同火車站同城堡影相啦，仲同ｏ左灰姑娘同白雪公主影相呀．
跟住去ｏ左Tomorrow Land，玩馳車天地，第一次玩，其實架車都唔洗我點控制，控制速度便可．跟住玩巴斯光年，仍然只是一級戰士．．．然後玩Space Mountain，發覺現在都不像以前那麼敢玩這些刺激的機動遊戲了．Space Mountain隔離是幸會史迪仔，見唔係好多人，便走了入去，不過今場是普通話，靠朋友翻譯了．開頭以為這個幸會史迪仔是無無聊聊，點知蠻搞笑，史迪仔(電腦來的)會同觀眾傾計，我還被他抽中了問我做唔做佢女朋友！最苦惱的是要說普通話呀！好彩我呢排睇多ｏ左台劇，簡單的都會說. 其實有些都聽唔明佢問我咩 =_=" 好彩有你翻譯啦．
玩完幸會史迪仔都１２點幾，便到皇室宴會廳食lunch，見天氣咁熱，叫了個天婦羅綠茶冷麵食．食完ｏ野便去看米奇水花巡遊，是在米奇「鼠」假大派對內才有的．這個巡遊分了濕身區同乾爽區，好細心喔！我們企ｏ左o係濕身區，不過準備了遮 : ) ｄ花車同表演者都是會向你噴水的，我們打了傘，都不會太濕，最後有位表演者拿著水喉在我們的遮下面對準了我們，我心想今次實濕晒，點知係玩的，只是噴d風出o黎啦！好好玩啊！迪士尼巡遊真是很好看啊，永遠都是配合著好好聽的迪士尼音樂呢．
然後去ｏ左幻想世界，先到米奇幻想曲看3D電影，雖然這套片我已看了３次，但仍覺得好好看，特別是跟著阿拉丁坐飛墊的那一段，配合著阿拉丁的主題曲 - Whole New World（我亦很喜歡這首歌喔），真是很正！我覺得米奇幻想曲是Hong Kong Disneyland最好玩的吖！跟住去ｏ左Winnie the Pooh，每次玩或同朋友們提起這個，都會說日本的Winnie the Pooh好玩好多，真的，我也想再到東京Disneyland玩過．
幻想世界之後便到海盜世界，即是平時的探險世界，不過呢排「鼠」假被海盜霸ｏ左，周圍都掛了海盜旗，很有趣呢．我們先玩了海盜版森林河流之旅，其實只係比普通版多ｏ左個海盜．然後看海盜訓練營，有位海盜教幾位觀眾舞海盜劍，蠻搞笑的，突然，Jack船長在我們後面出現！我真是嚇了一跳，因為他突然間出現，而且他真是十個似Johnny Depp!!! 之前看雜誌已看到有位好似Johnny Depp的Jack船長，估不到真是會出現！連ｄ動作都有點似，好搞笑．這個「鼠」假還有些嘉年華遊戲，都不用錢的，排隊就可以了，我們先玩了射酒樽，排隊時見小朋友多數都起碼中一個，我竟然一個都唔中，得貼紙，點知你中晒５個，贏ｏ左２個Disney杯墊，ｄ小朋友仲在後面嘩嘩聲，看你那麼神氣！（哈哈，我當然要了你一個杯墊啦．）跟住玩鐡勾船長大圈套，今次我中了一個啦，有條海盜米奇頭巾，呵呵．然後玩擲波仔，本應一個都唔中的，但工作人員幫我擲中一個，所以有埋米奇手巾，嘻嘻，好開心喔．
本來想看５：１５的米奇金獎，不過滿了坐，便先去坐小火車．６點再到米奇金獎，都是美女與野獸那幕最吸引，好靚．
看完米奇金獎都７點了，便找地方食ｏ野，去ｏ左海盜河景餐廳食，食物ｏｋ啦．食食ｏ下，突然下好大好大雨，然後閃電，白天的時候是一舊雲都無喎！還有星夢奇緣煙花未看呀！還記得上次ｏ黎的時候坐ｏ係比較前的位置看煙花，感覺真是很感動喔，真的感覺到迪士尼樂園的奇妙．今晚結果都是取消了 : ( 最後到小鎮大街購物啦，下次再去或到日本看煙花囉！
